१४ फाल्गुन २०७६, बुधबार ०९:३३ बुधवार साप्ताहिक, नयाँबानेश्वर, काठमाण्डौं

दुई वर्षपछि बल्ल पूर्णता

काठमाडौं । दुई वर्षदेखि ठप्प रहेको नेपाल कृषि अनुसन्धान परिषद् (नार्क) ले अब गति लिने सम्भावना देखिएको छ । केही दिनअघि नार्कको परिषद्ले पूर्णता पाउनुका साथै नयाँ कार्यकारी–निर्देशक चयन भएसँगै त्यस्तो सम्भावना देखिएको हो ।
कृषि क्षेत्रको प्राज्ञिक एवं अनुसन्धान गर्ने थलो नार्कको परिषद् दुई वर्षदेखि खाली रहँदै आएको थियो । १६ जना रहने परिषद्मा मन्त्रीसहित नौजना विज्ञ मनोनीत हुने गथ्र्याे । तर, दुई वर्षयता विज्ञहरू मनोनीत नहुँदा परिषद् अपूर्ण रहँदै आएको थियो र कुनै निर्णय हुन सकेको थिएन । तर, केही दिनअघि भने मन्त्रिपरिषद्को बैठकले सातजना विज्ञहरूलाई नार्कको परिषद्मा पदेन सदस्यमा नियुक्त गरेको छ ।
कृषि तथा पशुपन्छी विकासमन्त्री घनश्याम भुसालले परिषद्मा सातजना विज्ञको नाम मन्त्रिपरिषद्मा सिफारिस गरेपछि त्यसलाई स्वीकृत गरेको हो । सिफारिस हुनेहरूमा वैज्ञानिक डा. स्वयंप्रकाश श्रेष्ठ, डा. युवनाथ घिमिरे, डा. विनायकप्रसाद राजभण्डारी, गोविन्द केसी, यमुना घले, डा. कृष्णप्रसाद पौडेल र सीपी शर्मा रहेका छन् । उनीहरूका कार्यकाल दुई वर्षको रहनेछ । परिषद्को अध्यक्ष भने मन्त्री रहने व्यवस्था रहेको छ ।
नार्कको कार्यकारी निर्देशकमा भने मुख्य वैज्ञानिक डा. दीपक भण्डारी नियुक्त भएका छन् । करिब एक महिनाअघि डा. भण्डारीले कायममुकायम कार्यकारी–निर्देशककको जिम्मेवारी पाएका हुन् । उनी वरिष्ठ कर्मचारीमा पर्दछन् । निमित्त कार्यकारी निर्देशक डा. टेकबहादुर गुरुङको पदावधि सकिएसँगै रिक्त भएको सो पदमा वरिष्ठमध्येबाट डा. भण्डारीले जिम्मेवारी पाएका हुन् ।
दुई वर्षदेखि परिषद् खाली हुँदा बैठक बस्न सकिरहेको थिएन । बैठक नभएको हुँदा नार्कको कामकारबाही प्रभावित बन्न पुगेको थियो । कर्मचारीहरूको भर्ना, बढुवालगायत सबै प्रक्रिया रोकिन पुगेको थियो । कर्मचारी भर्ना र बढुवासम्बन्धी केही विनियम लोकसेवा आयोगको वर्तमान संरचनाअनुरूप नभएको हुँदा लोकसेवाले त्यसलाई सच्याएर पठाउन भने पनि परिषद्को बैठक बस्न नसक्दा त्यो त्यत्तिकै अड्किएर रहेको थियो । नयाँ कर्मचारी भर्ना प्रक्रिया रोकिँदा नार्कमा करिब ४० प्रतिशत कर्मचारी खाली रहेका छन् । कामु कार्यकारी–निर्देशक डा. भण्डारीले भने, ‘परिषद्ले पूर्णता पाएको हुँदा अब चाँडै नै बैठक बस्छ र रोकिएको कामहरूले गति लिनेछ ।’