२१ फाल्गुन २०७६, बुधबार ०६:१६ बुधवार साप्ताहिक, नयाँबानेश्वर, काठमाण्डौं

देउवाको ओत लाग्दै सिटौला

काठमाडौं । पार्टीको अघिल्लो १३औं महाधिवेशनमा आफूलाई साथ दिएका नेताले धमाधम छाड्दै गएपछि कृण्षप्रसाद सिटौला अन्ततः सभापति शेरबहादुर देउवाको ओत लाग्न पुगेका छन् । पछिल्लो कार्यविभाजनमा दुई आमन्त्रित केन्द्रीय सदस्य र एक विभाग प्रमुख पाएपछि सिटौला संस्थापन समूहसँग घुस्रन पुगेका हुन् ।
अघिल्लो महाधिवेशनमा सिटौलालाई काँधमा बोकेर हिँडेका युवा नेता गगन थापा, उमाकान्त चौधरी लगायतले साथ छाडेपछि तिलिमिलाएका उनी कांग्रेसभित्रको पछिल्लो कचिंगलमा रामचन्द्र पौडल समूहको भेला बैठकमा जाने गरेका थिए । तर, पौडल समूहले देउवाको जति विरोध गरे पनि केहि गर्न सक्ने आँट नदेखेपछि उनी पुनः देउवातिर लागेको बताइन्छ । सिटौलाले पनि साथ दिएपछि देउवाले पार्टीभित्र एकलौटी निर्णय गर्दै आएका छन् । २० वटा विभाग गठन गर्दा पौडेल समूहलाई एकजना पनि दिएनन् । आमन्त्रित सदस्य पनि सुधीर शिवाकोटी र गोपाल बस्नेत दुईजना सिटौलालाई दिए भने २० विभागमा एकजना शिव हुमागार्इं सिटौला समूहलाई दिएर १९ जना आफ्नो समूहका राखे ।
पौडेल समूहले विरोध गर्ने तर परिणाममै परिवर्तन ल्याउन सक्नेगरी केहि गर्न सक्ने पाइन नदेखेपछि देउवाले एकलौटी निर्णय लिएको बताइन्छ । त्यसो त पौडेल समूहभित्र देउवाका विरुद्ध एकजस्तो देखिए पनि प्रकाशमान सिंह, कोइराला परिवार आदिका अलगअलग गुट भएका कारण पनि त्यो समूहले आफ्ना कदमविरुद्ध धक्का दिने हैसियत नराख्ने देउवा पक्षको बुझाइ छ । पौडेल समूहको निरीहता र संस्थापन समूहको कदमलाई हेर्दा आगामी महाधिवेशनमा पनि देउवा नै नेतृत्वमा आउने आँकलन गर्न थालिएको छ ।