२८ आश्विन २०७७, बुधबार ०४:२९ बुधवार साप्ताहिक, नयाँबानेश्वर, काठमाण्डौं

काठ तस्कर छुटाउन उपाध्यक्षको दौडधुप

काठमाडौं । हेटांैडा उपमहानगरपालिका–१९ तीनताप्केमा बरामद भएको अवैध एक ट्याक्टर काठ र काठ तस्कर युवालाई छुटाउन सत्तारूढ दलका नेताहरूको दौडधुप चलेको छ । प्रहरीले सो काठसहितका युवालाई असोज २० गते पक्राउ गरी मनहरीस्थित इलाका वन कार्यालयलाई जिम्मा लगाएको थियो ।
पहिलेदेखि नै काठ तस्किरीमा संलग्न मनहरीका स्थानीय दुई युवा राजकुमार विष्ट र सरोज अर्याल अवैध काठ लैजाने क्रममा पक्राउ परेका हुन् । नम्बर नखुलेको ट्याक्टरमार्फत काठ ओसारपसार गरिरहेका उनीहरू सामानसहित इलाका वन कार्यालयको हिरासतमा रहेका छन् । वन कार्यालयले आवश्यक अनुसन्धानपछि वन कसुर ऐनअन्तर्गत कारबाही चलाउने तयारी गरिरहेको छ । तर, मनहरि गाउँपालिकाकी उपाध्यक्ष मनिला विष्टलगायत अन्य नेताहरूले रातदिन दबाब दिएर अभियुक्त छुटाउन पहल गरिरहेको जिल्ला वन कार्यालय स्रोतको भनाइ छ । स्मरणीय छ, अभियुक्त विष्ट गाउँपालिका उपाध्यक्ष मनिला विष्टको नातामा नजिकको भाइ हुन् । ती दुई युवा विद्यार्थी संगठनमा समेत काम गर्ने गरेको बताइन्छ ।