२४ मंसिर २०७७, बुधबार ०५:५६ बुधवार साप्ताहिक, नयाँबानेश्वर, काठमाण्डौं

एसओएस म्यानपावरमा छापा

काठमाडौं । वैदेशिक रोजगार व्यवसायी संघका नेतृत्व तहमा रहेका व्यक्तिहरूसमेत संलग्न र म्यानपावर कम्पनी क्षेत्रको ठूलो कारोबार गर्ने संस्थाका रूपमा चिनिएको एसओएस म्यानपावर सर्भिस प्रालि कालोसूचीमा परेको छ । कुनैबेला वैदेशिक रोजगार क्षेत्रको राम्रो र प्रतिष्ठित कम्पनी भनेर वैदेशिक रोजगार विभागबाट पुरस्कृतसमेत भएको सो कम्पनीले लकडाउनका बेला गलत धन्दा गरेर कालोसूचीमा परेको हो ।
पछिल्लो समय कोभिड–१९ अर्थात् कोरोना भाइरसको प्रकोप बढेसँगै म्यानपावर कम्पनीहरूको काममा मन्दी आएको छ । लामो समय सरकारी कार्यालयसमेत बन्द भएकाले आएका डिमान्डहरू पनि प्रक्रिया अघि बढाउन समस्या पर्दै आएको थियो । यही बीचमा सो कम्पनीले कतार पुलिसका लागि डिमान्डको पूर्वस्वीकृतिबिना नै अन्तर्वार्ता लिइरहेको सूचना पाएपछि विभागले छापा हानेको हो । विभागको टोलीले एसओएस कम्पनीले गोप्य रूपमा अन्तर्वार्ता लिइरहेकै अवस्थामा रंगेहात फेला पारेको हो । केही दिनअघि कतार पुलिसका लागि गोप्य अन्तर्वार्ता लिँदालिँदै वैदेशिक रोजगार विभागले दुई म्यानपावरमा छापा हानेको हो । वैदेशिक रोजगार विभागले एकै दिन दुई ठूला म्यानपावर कम्पनी एसओएस म्यानपावर र डीडी ह्युमन रिसोर्स प्रालिमा छापा मारेको हो । धापासीमा रहेको एसओएस म्यानपावर सर्भिस प्रालि र गौरीघाटमा रहेको डीडी ह्युमन रिसोर्स प्रालि दुवैले विभागबाट पूर्वस्वीकृति नै नलिई अन्तर्वार्ता लिइरहेको बताइन्छ । अझ डीडी ह्युमन रिसोर्स म्यानपावरले एउटै ठूलो कोठामा सयौंको संख्यामा युवाहरूलाई राखेर तालिमसमेत दिइरहेको विभागका अधिकारीले जानकारी दिए । एसओएस कम्पनी वैदेशिक रोजगार व्यवसायी संघका पूर्वअध्यक्ष सोमलाल बाटाजुसमेत संलग्न भएको कम्पनी हो । कतार सरकारले २०२२ मा हुने वल्र्डकपका लागि भनेर नेपालबाट कतार पुलिसका लागि ठूलो संख्यामा नेपाली लैजाने र आकर्षक तलब र सुविधा दिने भन्ने कुराले कतार पुलिसमा जान धेरै युवा म्यानपावर कम्पनीमा धाइरहेका देखिन्छन् । हालै सरकारले कतारमा रोजगारीमा पठाउन सिन्डिकेटको झल्को दिइरहेका बेला कतार पठाउन छानिएका १७ कम्पनीमध्ये एसओएस म्यानपावर र डीडी ह्युमन रिसोर्स प्रालिमा नै यस्ता कार्य हुनुले आशंका थपिएको बताइन्छ । विभाग टोलीले दुवै म्यानपावर सञ्चालकलाई आवश्यक कागजातसहित विभागमा उपस्थित हुन पत्र काटेको छ । उनीहरू कालोसूचीमा परेको बताइएको छ ।