२१ माघ २०७७, बुधबार ०५:३८ बुधवार साप्ताहिक, नयाँबानेश्वर, काठमाण्डौं

कोरा व्यक्तिलाई बिमाको ताला–चाबी

काठमाडौं । बिमा क्षेत्रको खासै अनुभव नभएका कोरा मानिसलाई बिमा समितिको अध्यक्षमा नियुक्त गरिएको छ । केही दिनपूर्व मात्रै पूर्वगृह सचिव सूर्यप्रसाद सिलवाललाई समितिको अध्यक्षमा नियुक्त गरिएको हो ।
अवकाश पाएपछि कुनै न कुनै नियुक्ति ताक्ने अधिकांश पूर्वप्रशासकहरूजस्तै पूर्वगृह सचिव सिलवालले पनि नियुक्तिका लागि दौडधुप गरेका थिए । उनले अख्तियार दुरुपयोग अनुसन्धान आयोगमा आँखा लगाएका थिए । तर, आयोगको सदस्यका लागि पहल गरे पनि उनी सिफारिसमा पर्न सकेनन् । आयोगमा नपरेको बदलामा उनलाई अहिले सरकारले बिमा समितिको अध्यक्षमा नियुक्त गरेको बुझिएको छ ।
तर, बिमाको अध्यक्षमा नियुक्त भए पनि उनी बिमा क्षेत्रका अनुभवी व्यक्ति भने होइनन् । उनलाई बिमा ऐनविपरीत सरकारले नियुक्त गरेको छ । बिमा ऐन, २०४९ मा बिमाको अध्यक्ष हुन इन्स्योरेन्ससम्बन्धी ज्ञान भएको व्यक्ति हुनुपर्ने प्रस्ट रूपमा उल्लेख गरिएको छ । तर, सिलवालमा भने बिमासम्बन्धी कुनै ज्ञान नभएको बताइन्छ ।
यसअघि बिमाको अध्यक्षमा चिरञ्जीवी चापागार्इंलाई नियुक्त गरिँदा बिमा ऐनविपरीत नियुक्त गरिएको भन्दै सर्वोच्च अदालतमा मुद्दा परेको थियो । मुद्दाको फैसला हुन लामो समय लागेको हुँदा उनले आधाजति अवधि काम गरिसकेका थिए । आधा अवधि काम गरिसकेको हुँदा तत्कालीन समयमा अदालतले फैसला गर्दै ‘आगामी दिनमा नियुक्ति गर्दा ऐनलाई टेकेर मात्रै नियुक्ति गर्नुहोला’ भनिएको थियो ।
सर्वोच्चले पूर्वअध्यक्ष चापागार्इंको विषयमा गरेको फैसलाको नजिर हुँदाहुँदै अहिले बिमासम्बन्धी कुनै ज्ञान नै नभएको सिलवाललाई नियुक्ति गरिएको छ । यो नियुक्तिले अनुभव नै नभए पनि सरकारको आशीर्वाद रह्यो भने जस्तोसुकै मानिसले पनि जस्तोसुकै क्षेत्रको जिम्मेवारी पाउँछन् भन्ने पुष्टि गरेको छ । बिमा क्षेत्रका एकसे एक मानिसहरू अध्यक्ष बन्न योग्य हुँदाहुँदै सिलवाललाई नियुक्त गरिनु रहस्यमय बन्न पुगेको छ ।