१२ बैशाख २०७८, आईतवार ०२:२२ बुधवार साप्ताहिक, नयाँबानेश्वर, काठमाण्डौं

‘हटस्पट’ मा लकडाउन र लामो दूरीका यातायात तत्काल बन्द गर्न प्रधानमन्त्रीलाई सीसीएमसीको सुझाव

काठमाडौं । कोभिड–१९ संकट व्यवस्थापन केन्द्र सीसीएमसीले कोरोना संक्रमण धेरै फैलिएको स्थानमा लकडाउन गर्न प्रधानमन्त्री केपी शर्मा ओलीलाई सुझाव दिएको छ ।

शनिबार साँझ प्रधानमन्त्रीको सरकारी निवास बालुवाटार मा आयोजित छलफल ब्रिफिङ मा सीसीएमसीका सदस्यले प्रधानमन्त्री ओलीलाई कोरोनाका‘ हटस्पट हरूमा नेपालगञ्जमा जस्तै कडाइ गर्नुपर्ने सुझाव दिएका हुन् । यस्तै सीसीएमसीका सदस्यहरूले लामो दूरीका यातायात तत्काल बन्द गर्नुपर्ने सुझाव पनि प्रधानमन्त्रीलाई दिएका छन् ।

स्वास्थ्य तथा जनसंख्या मन्त्रालयका अनुसार शनिबारसम्म काठमाडौं उपत्यका काठमाडौं, भक्तपुर र ललितपुर सहित पर्सा, कास्की, दाङ, बाँके र रूपन्देहीमा संक्रिय संक्रमितको संख्या ५ सय नाघिसकेको छ । ठूला शहरहरूमा तत्काल बन्दाबन्दी नगरे अवस्था भयावह हुने सुझाव प्रधानमन्त्री ओलीलाई दिइएको एक मन्त्रीले जानकारी दिएका छन् । सुझाव सुनिसकेपछि प्रधानमन्त्री ओलीले यस विषयमा प्रस्ताव तयार पारी मन्त्रिपरिषदमा बुझाउन सीसीएमसीका अधिकारीलाई निर्देशन दिएका छन् ।