४ मंसिर २०७९, आईतवार ०६:१४ बुधवार साप्ताहिक, नयाँबानेश्वर, काठमाण्डौं

किरिया बसेका चार दाजुभाइले गरे मतदान

सिन्धुपाल्चोक । सिन्धुपाल्चोकको चौतारा साँगाचोकगढी नगरपालिका–४ मा किरियापुत्रीले पनि मतदान केन्द्रमा पुगेर मतदान गरेका छन् । आमाको किरिया बसेका चूर्णप्रसाद श्रेष्ठ, कमल श्रेष्ठ, मानबहादुर श्रेष्ठ, पूर्णप्रसाद श्रेष्ठ र उनीहरुका श्रीमतीसहितले मतदान गरेका हुन् ।

कालिकादेवि मावि मतदान केन्द्रमा प्रतिनिधिसभा र प्रदेशसभा सदस्यका उम्मेदवारहरुलाई भोट दिएका छन् । उनीहरु तीन दिनदेखि आमाको मृत्युको शोकमा किरिया बसिरहेका छन् । मतदानको अनुभव सुनाउँदै कमल श्रेष्ठले भने, ‘दुःखको घडीमा पनि स्पष्ट भिजन मिसन भएको नेतृत्व जिताउन मतदान गर्न आएको हो ।’ यस्तै चूर्णप्रसाद श्रेष्ठले आमा वितेको बेला पनि राज्य चलाउन आफ्नो मतको महत्व बुझेर आफू मतदानमा सहभागी भएको बताए ।

जीवनको सबैभन्दा दुःखद क्षणमा पनि मतदान गर्नका लागि मतदानस्थल पुगेका उनीहरुले आफ्नो मतले आगामी पाचँ वर्षका लागि देशको भविष्य निर्धारण गर्ने बताएका छन् । मतदान भनेको यो युगको जिम्मेवारी भएकोले मतदान गरेर उत्साहित भएको उनीहरुको भनाई थियो ।

आफ्नो परम्परा अनुसार कसैलाई नछोई मतदान गर्ने वातावरण बनाइएको थियो । सिन्धुपाल्चोकको एक सय ४५ मतदानस्थलहरुमा ३ सय २० मतदान केन्द्रमै उत्साहजनक रूपमा बिहान ७ बजेदेखिनै मतदान भइरहेको छ । धेरै मतदान केन्द्रमा बिहानैदेखि मतदाताको लाइन लागेको छ । जिल्लामा शान्त र सामान्य रुपमा मतदान भईरहेको छ । सुरक्षा व्यवस्थापन कडा गरिएको छ ।