४ पुष २०७५, बुधबार ०५:२५ बुधवार साप्ताहिक, नयाँबानेश्वर, काठमाण्डौं

अन्तत शाही दलको नेता

काठमाडौं । अन्ततः नेपाल कम्युनिस्ट पार्टी (नेकपा) को कर्णाली प्रदेश संसदीय दलको नेतामा महेन्द्रबहादुर शाही चयन भएका छन् । सोमबार बसेको संसदीय दलको बैठकले मुख्यमन्त्रीसमेत रहेका शाहीलाई दलको नेता चयन गरेको हो ।
दलहरूबीच भएको सहमतिविपरीत आफू दल नेता हुनुपर्ने भन्दै प्रदेशका सहइन्चार्ज यामलाल कँडेलले दलको नेता चयनको काम अड्काउँदै आएका थिए । तर, उनको त्यो प्रयत्न असफल भएको छ । केही नलागेपछि कँडेलले नै दलको नेतामा मुख्यमन्त्री शाहीलाई प्रस्ताव गरेपछि सबैले सहमति जनाएका थिए । संसदीय दलको नेता चयन नहुँदा यसअघिका बैठकमा ज्येष्ठ सदस्यले अध्यक्षता गर्दै आएका थिए । यसअघि उनले नियमविपरीत प्रादेशिक संसदबाट दलको नेताको सुविधासमेत लिँदै आएका थिए । सुविधा खोसिने भएपछि उनले नेकपाको प्रदेश कमिटीको पहिलो बैठक नै बहिष्कार गरेका थिए । दलको नेता चुन्न हलो अड्काइरहेपछि नेकपाको कन्द्रीय सचिवालयले समेत दलको नेतासम्बन्धी निर्देशनपत्र पठाएको थियो । सो पत्र प्रदेश कमिटी अध्यक्ष गोरखबहादुर बोगटीले पढेर सुनाएका थिए । जुन पत्रमा मुख्यमन्त्री नै दलको नेता रहने उल्लेख थियो ।