११ असार २०७६, बुधबार ०६:३६ बुधवार साप्ताहिक, नयाँबानेश्वर, काठमाण्डौं

नवप्रज्ञापनमाथि विमर्श

काठमाडौं । साहित्यिक त्रैमासिक नवप्रज्ञापनको ८४औं बहुभाषा कथा विशेषांक एक समारोहबीच औपचारिक रूपमा सार्वजनिक गरिएको छ । गत बिहीबार आयोजित एक विशेष समारोहमा विशेषांक सार्वजनिक गरिएको हो ।
कार्यक्रममा नेपाल पत्रकार महासंघ काठमाडौंका अध्यक्ष शन्तराम बिडारी, साहित्यकार एवं लघुकथा विज्ञ डा. पुष्करराज भट्ट, रेखांकन मासिकका प्रधानसम्पादक शैलेन्द्र केसी, अधिवक्ता शिव देवकोटालगायतका व्यक्तित्वहरूको उपस्थिति थियो ।
कार्यक्रममा पत्रिका प्रकाशक सम्पादक नवराज रिजालले अथक मेहनतका साथ विशेषांक प्रकाशन गरेको बताउँदै साहित्यिक पत्रकारिता चुनौतीपूर्ण मोडमा रहेको जानकारी दिए । उनले राज्यले साहित्यिक पत्रकारितालाई उपेक्षा गरेको गुनासो उनको थियो ।
त्यसैगरी पत्रकार महासंघ काठमाडौँका अध्यक्ष बिडारीले नेपाली साहित्यिक पत्रकारिता जगतमा नवप्रज्ञापन त्रैमासिकको विशेष योगदान रहेको चर्चा गरे । उनले राज्यले गर्नुपर्ने काम व्यक्तिको प्रयासमा गरेकोमा नवप्रज्ञापन परिवारलाई विशेष धन्यवाद दिए । कृतिमा राष्ट्रिय जनगणना २०६८ को तथ्यांकअनुसार सूचीकृति ११ भाषामध्ये १० भाषाभाषीको चर्चित कथाकारहरूको कथा समावेश छ ।
कार्यक्रममा कृतिका सहसम्पादक प्रमोद पाण्डेले सहभागीहरूलाई स्वागत गर्दै आगामी दिनमा पनि यस्ता विशेषाङ्क प्रकाशनको जमर्को जारी राख्ने बताए ।