८ श्रावण २०७६, बुधबार ०१:४४ बुधवार साप्ताहिक, नयाँबानेश्वर, काठमाण्डौं

४० प्रतिशत नेतालाई नयाँ जिम्मेवारीको गृहकार्य भूगोलमा खटिए २ सय ६३ नेता

काठमाडौं । नेपाल कम्युनिस्ट पार्टी (नेकपा) ले ४० प्रतिशत नेतालाई केन्द्रीय विभाग र जनसंगठनको काममा खटाउनेगरी थप कार्यविभाजनको गृहकार्य गरेको छ ।
पछिल्लो सचिवालय बैठकले ८३ इन्चार्ज र १ सय ५२ सहइन्चार्जसहित २ सय ३५ नेतालाई भूगोलमा जिम्मेवारी दिएको छ । अघिल्लो असोजमा सात प्रदेश कमिटीमा इन्चार्ज, सहइन्चार्ज, अध्यक्ष र सचिवसहित २८ नेताले जिम्मेवारी पाएका थिए । यससहित २ सय ६३ नेताहरूलाई भूगोलको जिम्मेवारीमा खटाइएको महासचिव विष्णु पौडेलले जनाएका छन् । अहिले दुई अध्यक्षसहित ४ सय ४१ सदस्यीय केन्द्रीय कमिटीमा ४ सय ३७ जना केन्द्रीय कमिटीमा छन् । कार्यविभाजन सकिँदा दुई अध्यक्षबाहेक ४ सय ३५ नेताले जिम्मेवारी पाउने महासचिव पौडेलले हिसाब निकालेका छन् ।
तत्कालीन केन्द्रीय सदस्य रवीन्द्र अधिकारी र डीआर पौडेलको निधन भएको छ भने डा. वंशीधर मिश्र बंगलादेशको राजदूतमा नियुक्त भएका छन् । त्यस्तै, समिममिया अन्सारीले राजीनामा दिएकाले ती पद रिक्त छन् ।
बिहीबार बस्ने सचिवालय बैठकबाट ३२ केन्द्रीय विभागमा प्रमुख र उपप्रमुख तथा २२ जनसंगठनमा इन्चार्ज र सहइन्चार्ज तोक्ने नेकपाको तयारी छ । बाँकी केन्द्रीय सम्पर्क समन्वय कमिटी, विशेष प्रदेश कमिटी र प्रवास कमिटीमासमेत केही केन्द्रीय सदस्यहरूले जिम्मेवारी पाउनेछन् । तर, यी तीनवटै कमिटीका एकीकरण सम्पन्न भइसकेका छैनन् । विभागीय सचिवहरू भने केन्द्रीय सदस्यमध्येबाट सचिवालयबाटै तोक्ने कि प्रमुख र उपप्रमुखलाई जिम्मा दिने विकल्पमा छलफल बाँकी रहेको बताइएको छ ।

१६ जिल्लामा तोकिएनन् सहइन्चार्ज
८३ जिल्ला कमिटीमा इन्चार्ज र सहइन्चार्ज तोकिएकोमा १६ जिल्लामा नेकपाले सहइन्चार्ज तोकेको छैन । ताप्लेजुङमा भाष्कार काफ्ले, सप्तरीमा रामप्रीत पासवान, नुवाकोटमा महेन्द्र पाण्डे, काभ्रेमा गोकुल बास्कोटा, म्याग्दीमा भूपेन्द्रबहादुर थापा, नवलपरासी पश्चिममा बैजनाथ चौधरी एकल जिम्मेवारीसहित इन्चार्ज तोकिएका छन् ।
त्यस्तै, मुस्ताङमा श्रीमाया थकाली, गुल्मीमा दिनेश पन्थी, प्युठानमा कृष्णध्वज खड्का, कालिकोटमा महेन्द्रबहादुर शाही, हुम्लामा विजय भण्डारी, डोल्पामा हंशबहादुर शाही, दार्चुलामा गणेश ठगुन्ना, इलाममा धीरेन्द्र शर्मा, ओखलढुंगामा यज्ञराज सुनुवार र धनकुटा हेमराज भण्डारीलाई इन्चार्ज तोकिएको छ । तर यी जिल्लाहरूमा सहइन्चार्ज तोकिएको छैन ।