२१ फाल्गुन २०७६, बुधबार ०५:५७ बुधवार साप्ताहिक, नयाँबानेश्वर, काठमाण्डौं

उमेर नाघेका सिटौलाविरुद्ध उजुरी

काठमाडौं । उमेर हद नाघिसके पनि पदमै रहेका औद्योगिक क्षेत्र व्यवस्थापन लिमिटेडका महाप्रबन्धक सुवास सिटौलाविरुद्ध सर्वोच्च अदालतमा मुद्दा दायर भएको छ । ६५ वर्ष उमेर नाघिसके पनि अझै महाप्रबन्धकको जिम्मेवारीमा रहेका उनीविरुद्ध पदबाट हटाइमाग्न मुद्दा दायर गरिएको हो ।
महाप्रबन्धक सिटौलाविरुद्ध मुद्दा दायर भएपछि उनलाई आउँदो फागुन २७ गते उपस्थित हुन आउन सर्वोच्च अदालतले आदेश दिएको छ । गएको फागुन १६ गते सर्वोच्च अदालतका न्यायाधीश प्रकाशकुमार ढुंगानाको इजलासले उत्प्रेषण जारी गर्दै ‘निवेदकले अन्तरिम आदेशसमेत माग गरेको परिप्रेक्षमा विचार गर्दा दुवै पक्ष राखी निष्कर्षमा पुग्न मनासिब हुने देखिएकाले अन्तरिम आदेशको छलफलका लागि मिति २०७६÷११÷२७ गते मंगलबारको दिन १० बजे उपस्थित हुन आउनू भनी विपक्षीहरूलाई म्याद सूचना पठाई निवेदकलाई सोहीबमोजिमको तारेख तोकी सोको सूचनासमेत विपक्षीहरूलाई दिई नियमानुसार पेस गर्नू’ भन्ने व्यहोरो उल्लेख गरिएको छ ।
महाप्रबन्धक सिटौला र उनलाई नियुक्त गर्ने अर्थ मन्त्रालयलगायतविरुद्ध बालाजुका विवशराज श्रेष्ठले मुद्दा दायर गरेका थिए । निवेदकका तर्फबाट वरिष्ठ अधिवक्ता उपेन्द्रकेशरी न्यौपाने, अधिवक्ताद्वय परशुराम कोइराला र सुरेन्द्र थापाले बहस गरेका थिए ।
कानुनतः ६५ वर्ष उमेर नाघेपछि सरकारी पदमा बस्न नपाइने भए पनि महाप्रबन्धक सिटौला भने उमेर हद नाघिसक्दा पनि महाप्रबन्धकको जिम्मेवारीमा जबर्जस्ती रहँदै आएका छन् । ६६ वर्ष भइसक्दा पनि उनी हठपूर्वक महाप्रबन्धकको जिम्मेवारीमा छन् । औद्योगिक क्षेत्रका अध्यक्ष नन्दकिशोर बस्नेतले उनलाई बिदा दिएको पत्र दिए पनि र सो पत्र बुझे पनि उनी पदमा रहँदै आएका छन् ।