२१ फाल्गुन २०७६, बुधबार ०६:१९ बुधवार साप्ताहिक, नयाँबानेश्वर, काठमाण्डौं

कोरोनाका कारण नेकपाका कार्यक्रम प्रभावित

काठमाडौं । कोरोना भाइरसको त्रासका कारण सरकारको कार्यक्रम मात्र होइन, राजनीतिक दलका कार्यक्रमहरूसमेत प्रभावित बन्न थालेका छन् । यसैक्रममा नेपाल कम्युनिस्ट पार्टी (नेकपा) ले मंगलबारको लागि राखेको प्रदेश १ स्तरीय भेला तथा कार्यकर्ता प्रशिक्षण कार्यक्रम स्थगित गरेको छ । कार्यक्रममा सहभागी हुन वरिष्ठ नेता झलनाथ खनाल झापा पुगेका थिए । तर, उनी आफैंले कोरोनाको त्रासका कारण प्रदेश स्तरीय भेलाका साथै २१ फागुनमा सुखानीमा हुने सहिद स्मृतिसभा पनि स्थगित भएको जानकारी गराएका छन् । सहिद स्मृति कार्यक्रममा सहभागी हुन अध्यक्ष पुष्पकमल दाहाल ‘प्रचण्ड’ पनि झापा जाने तयारीमा थिए । त्यस्तै, सचिवालय सदस्य रामबहादुर थापा र महासचिव विष्णु पौडेल पनि झापा जाने अन्तिम तयारीमै थिए । त्यस्तै, नेकपा भ्रातृ संगठन युवासंघले पनि आफ्ना घोषित कार्यक्रमहरू स्थगित गरिएको बताएको छ ।
कोरोना भाइरस संक्रमण नियन्त्रणका लागि सरकारले ठूलो जमघट हुने कार्यक्रम नगर्न निर्देशन दिएको थियो । त्यसअनुसार धेरै भेला हुने सार्वजनिक कार्यक्रम धमाधम स्थगित हुन थालेको छ । कोरोना भाइरसको संक्रमण नेपालमा पनि देखा परेको भन्दै सरकारले भीडभाड र विवाह भोज नगर्न सोमबार निर्देशन दिएको थियो । सोही निर्देशनबमोजिम नेकपाले भेला स्थगित बताइएको छ ।
सरकारले कोरोनाको जोखिम रोकथाम नियन्त्रण र समन्वयका लागि उपप्रधानमन्त्री ईश्वर पोखरेलको नेतृत्वमा छुट्टै समिति नै बनाएर काम गरिरहेको छ । यसक्रममा जोखिम भएका मुलुकहरूमा उडान बन्द गर्नेदेखि सीमानाकामा कडाइ गर्नेसम्मका कामलाई सरकारले प्राथमिकताका साथ अगाडि बढाउँदै आएको छ ।