८ पुष २०७७, बुधबार ०५:०० बुधवार साप्ताहिक, नयाँबानेश्वर, काठमाण्डौं

मन्त्रीको लोभ देखाउँदै तान्दै

काठमाडौं । संसद् विघटन गर्ने प्रधानमन्त्री केपी शर्मा ओलीको कदम असंवैधानिक र राजनीतिक मूल्य र मान्यताविपरीत रहेको भन्दै उक्त मन्त्रिपरिषद्का सातजना मन्त्रीले गत आइतबार नै सामूहिक राजीनामा दिएका छन् । उनीहरूको राजीनामापछि सात मन्त्रालय अहिले नेतृत्वविहीन भएका छन् । तर, प्रधानमन्त्री ओलीले केही दिन मन्त्रिपरिषद् पुनर्गठन नगर्ने बुझिएको छ ।
शिक्षामन्त्री गिरिराजमणि पोखरेल, ऊर्जामन्त्री वर्षमान पुन, कृषिमन्त्री घनश्याम भुसाल, पर्यटनमन्त्री योगेश भट्टराई, वनमन्त्री शक्ति बस्नेत, श्रममन्त्री रामेश्वर राय र खानेपानीमन्त्री बिना मगरले राजीनामा दिएपछि नेतृत्वविहीन बन्न पुगेका ती मन्त्रालयलाई नेता किन्ने अस्त्रका रूपमा प्रयोग गर्ने रणनीति बालुवाटारले लिएको बुझिएको छ ।
ओलीको कदम चित्त नबुझ्दानबुझ्दै पनि कतिपय नेताहरू मन्त्रीको आशामा उक्त समूहमा लागेका छन् । टोपबहादुर रायमाझी, मणि थापा, लेखराज भट्टलगायत नेता मात्र होइनन्, साबिक एमालेमा माधव नेपाल समूहमा रहेका कतिपय नेता पनि ओली समूहको भेलामा सहभागी भएका छन् । अहिल्यै मन्त्रिपरिषद् पुनर्गठन गर्दा मन्त्री नपाउनेहरूले आफ्नो समूह छाडेर जाने बुझेका प्रधानमन्त्री ओलीले केही दिनसम्म धेरैलाई मन्त्री पद बाँडिरहने बुझिएको छ ।
ती मन्त्रालय नेतृत्वविहीन बन्दा राष्ट्रिय गौरवका आयोजनासमेत अलपत्र परेका छन् । गौरवका अधिकांश आयोजना पर्यटन र ऊर्जाअन्तर्गत नै पर्छन् ।