१२ फाल्गुन २०७७, बुधबार ०५:४६ बुधवार साप्ताहिक, नयाँबानेश्वर, काठमाण्डौं

जगदम्बा टिभिएसमा तालाबन्दी

काठमाडौं । कोभिड–१९ को महामारीपछि विभिन्न उद्योग, कलकारखाना थला परे । लामो समय उद्योग, कलकारखानाहरू सञ्चालनमा आउन सकेनन् र अहिलेसम्म पनि कतिपय उद्योग, कलकारखानाहरू पूर्ण रूपमा सञ्चालन हुन सकेका छैनन् । तर, जगदम्बा टिभिएस कम्पनीले भने कोभिड–१९ को महामारी कम भएसँगै व्यापारमा तरक्की नै ग¥यो ।
सो कम्पनीको बिक्री पहिलाको तुलनामा ९ सय प्रतिशतसम्म बढेको बताइन्छ । तर, बिक्रीमा रेकर्ड तोके पनि त्यही कम्पनीले कोभिड–१९ लाई कारण देखाएर मजदुरहरूमा व्यापक कटौती गरेको छ । कोभिड–१९ को महामारीका कारण कम्पनी नचलेको भन्दै केही समयअघि २० जना मजदुरलाई निष्कासन गरेपछि अहिले सो कम्पनीका मजदुरहरू आन्दोलित छन् । ती मजदुरहरूलाई व्यवस्थापन पक्षले पूर्वाग्रह राखेर निष्कासन गरेको मजदुरहरूको भनाइ छ ।
निष्कासनमा परेका मजदुरहरूले आफ्नो पुनर्बहाली हुनुपर्ने माग राख्दै आएका छन् । मजदुरहरूको छाता संगठन अन्टुफ पनि निष्कासनमा परेका मजदुरहरूको समर्थनमा उत्रिएको छ । निष्कासनमा परेका मजदुरहरूको पुनर्बहाली हुनुपर्ने माग राख्दै अन्टुफले केही दिनअघि सो कम्पनीको सोरुम र गोदाममा तालाबन्दी गरेको छ । मजदुरहरूको माग पूरा नभएसम्म ताला नखोल्नेमा मजदुर संगठन दृढ देखिएको छ ।
सो कम्पनीले श्रमिकहरूको श्रम ऐन, २०७४ को अपव्याख्या गरी मजदुरहरूलाई निष्कासन गरेको बताइएको छ । यसअघि पनि अन्टुफले श्रम ऐनको दुरुपयोग र अपव्याख्याका विरुद्धमा निरन्तर विरोध जनाउँदै आएको छ । यो विषयमा सबै मजदुर संगठनहरूको साझा धारणा बनेको बताइन्छ । पछिल्लो समय श्रम ऐनको अपव्याख्या गरेर मजदुरहरूलाई निष्कासन गर्न कतिपय उद्योग, कम्पनीहरू सक्रिय देखिँदै आएका छन् ।