२५ बैशाख २०७१, बिहीबार ०८:५९ बुधवार साप्ताहिक, नयाँबानेश्वर, काठमाण्डौं

हनिमुन पुरा हुने बेलाको निर्णय

बैशाख २५,काठमाडौं । हनिमून अवधी पुरा गर्न करिव दुई हप्ता मात्र बाँकि रहँदा प्रधानमन्त्री सुशील कोईराला नेतृत्वको सरकारले बल्ल एउटा देखिने काम गरेको छ । त्यो हो– राष्ट्रीय योजना आयोगको उपाध्यक्षमा प्रा डा गोविन्द पोखरेललाई नियुक्त गर्ने निर्णय ।
आज बसेको मन्त्रीपरिषद्को बैठकले आयोगको उपाध्यक्षमा पोखरेलललाई नियुक्त गर्ने निर्णय गरेको हो । नेपाली काँग्रेसको महासमिति सदस्य समेत रहेका पोखरेल बैकल्पिक उर्जा प्रबद्र्घन केन्द्रको कार्यकारी निर्देशक थिए । आफ्नो नीजि सचिवालय समेत गठन गर्न नसकेका कारण ‘सुस्त प्रधानमन्त्री’ भन्दै आफ्नै पार्टीभित्रवाट कोइरालाको व्यापक आलोचना हुने गरेको छ ।
यसअघि अर्थमन्त्रीले सरकारले जेठ मसान्तभित्रै नयाँ बजेट ल्याई असारमा पारित गर्ने तयारी गरेको बताए पनि राष्ट्रीय योजना आयोग नै खाली हुँदा त्यसमा विभिन्न आशंका गरिएका थिए । सरकारले संसद सचिवालसँगको परामर्समा आगामी जेठ ५ वाट बजेट अधिवेशन शुरु गर्ने तयारी गरिरहेको बुझिएको छ । बजेट अधिबेशन शुरु हुने समयको चापका कारण राष्ट्रीय योजना आयोगको उपाध्यक्ष को नियुक्ती गरिए पनि चाँडै पुर्णता दिनुपर्ने अन्य संबैधानिक आयोग, खाली रहेका १६ देशमा राजदूत नियुक्ती, प्रहरीको बढुवा लगायतका थुप्रै काम अझै अलपत्र छन् ।