६ फाल्गुन २०७०, मंगलवार १०:४८ बुधवार साप्ताहिक, नयाँबानेश्वर, काठमाण्डौं

नेम्वाङ सभामुखमा निर्वाचित

काठमाडौं । नेकपा (एमाले)का नेता सुवासचन्द्र नेम्वाङ सभामुख निर्वाचित हुनुभएको छ । हिजो बसेको संविधानसभाको बैठकले उहा“लाई सभामुख चयन गरेको हो । उहा“को नाममा एमाले संसदीय दलका नेता केपी शर्मा ओलीले प्रस्ताव र नेपाली कांग्रेसका नेता कृष्णप्रसाद सिटौलाले समर्थन गर्नुभएको थियो । हिजो १० देखि २ बजेसम्म उम्मेद्वारी दर्ताको समय तोकिएकोमा नेम्वाङको नाम मात्र परेको थियो ।
सभामुखमा संसद्को तेस्रो दल एनेकपा (माओवादी)ले दाबी गरे पनि अन्ततः उसले नेम्वाङलाई नै सघाउने निर्णय गरेको थियो । एमाओवादीले नेता कृष्णबहादुर महरालाई अघि सारेको थियो । तर नेपाली कांग्रेसलगायत प्रतिपक्षी दलहरुले समेत नेम्वाङलाई समर्थन गर्ने भएपछि एमाओवादी पछि हटेको हो । कांग्रेसले भने एमाले र कांग्रेसबीचको सहमतिअनुरुप प्रधानमन्त्रीमा सुशील कोइरालालाई सघाए बापत सभामुखमा एमालेलाई सघाउने निर्णय गरेको थियो । ठूलादेखि साना दलसम्मले रुचाएपछि विगतदेखि नै संसद्मा सन्तुलित भूमिका निर्वाह गर्दै आइरहनुभएका नेम्वाङलाई तेस्रो पटक सभामुख हुने बाटो सहज रुपमा खुलेको थियो । लगातार तेस्रो पटक सभामुख हुने सौभाग्य पाउनुभएका नेम्वाङ यसअघि २०६३ सालमा पुनःस्थापित प्रतिनिधिसभामा पहिलो पटक सभामुख हुनुभएको थियो भने ०६४ को पहिलो संविधानसभाको निर्वाचनपछि दोस्रो पटक सभामुख बन्नुभएको थियो । ०५१ सालमा मनमोहन अधिकारी नेतृत्वको एमाले सरकारमा कानुन, न्याय तथा संसदीय व्यवस्था मन्त्रीको जिम्मेवारी सम्हाल्नुभएको नेम्वाङ ०५६ सालमा इलाम–२ बाट निर्वाचित हुनुहुन्थ्यो भने ०४८ सालमा राष्ट्रिय सभामा निर्वाचित हुनुहुन्थ्यो ।