११ असार २०७१, बुधबार ०७:०६ बुधवार साप्ताहिक, नयाँबानेश्वर, काठमाण्डौं

दोषजति वामदेव र शंकरलाई

काठमाडौँ । नवौँ महाधिवेशनमा देशभरबाट छानिएर आएका प्रतिनिधिको संख्या आफ्नो पक्षमा निकै कमजोर देखेपछि अध्यक्षका प्रयासी केपी ओली समूहभित्रको एउटा समूहले त्यसको सम्पूर्ण दोष सोही समूहका हर्ताकर्ता वामदेव गौतमलाई लगाएको छ ।
एमालेले केही जिल्लाबाहेक सबै ठाउँमा एकै दिन असार ७ गते प्रतिनिधि छान्ने निर्णय गरेको थियो । सोही निर्देशन अनुसार सहमति र प्रतिस्पर्धाबाट प्रतिनिधिको परिणाम आउने क्रम शनिबार दिउँसोबाटै भएको थियो । उक्त दिन करिब चार सय प्रतिनिधिको नामावली बाहिर आएको थियो । बाहिर जे जस्तो प्रचारबाजी गरे पनि उक्त परिणाममा ७० प्रतिशत प्रतिनिधि अध्यक्षका प्रत्यासी वरिष्ठ नेता माधव नेपालको पक्षमा देखिएपछि ओली समूहको एउटा भित्री समूहको गोप्य बैठक नयाँ बानेश्वरस्थित एक होटलमा बसेको थियो । उक्त बैठकको नेतृत्व शंकर पोखरेलले गरेको बुझिएको छ । स्रोतका अनुसार उक्त प्रारम्भिक परिणाम हेरेरै सो समूह नेपालले महाधिवेशनमा डेढ सयदेखि दुई सयको मत अन्तरले जित्ने निष्कर्षमा पुगेको थियो ।
नतिजा त्यस्तो आउनुमा मुख्य कारण अरू केही नभएर वामदेव गौतम नै भएको निष्कर्ष पनि त्यो भेलामा निकालिएको विश्वस्त सूत्रले बतायो । गौतमका उत्ताउला अभिव्यक्तिले कार्यकर्ता उल्टै भड्किएको भन्दै सहभागीहरूले उनको सत्तोसराप गरेको बताइन्छ । उता गौतम, सो समूहबाट फेरि पनि महासचिवका उम्मेदवार ईश्वर पोखरेललगायत भने शंकर पोखरेलसँग चिढिएको बताइन्छ । आफूलाई ‘महान् विचारक’ भन्ने तर सार्वजनिक रूपमा विधानविपरीतका कुरा गर्दै हिँडेको आरोप उनीहरूले पोखरेलमाथि लगाएका छन् । पोखरेलले ‘विधान अनुसार नेपाल अध्यक्षमा उठ्नै नपाउने भनेर’ लाटोले पनि नपत्याउने र जग हँसाउने कुरा गरेको उनीहरूले निष्कर्ष निकालेका छन् ।