२७ फाल्गुन २०७१, बुधबार ०९:२७ बुधवार साप्ताहिक, नयाँबानेश्वर, काठमाण्डौं

सभामुख असन्तुष्ट

काठमाडौं । अनिश्चितकालका लागि संविधानसभाको बैठक रोकेमा दलहरुबीच सहमति हुन्छ भनिए पनि एक महिना बित्दासमेत कुनै काम नहँदा संविधानसभाका अध्यक्ष सुवास नेम्वांग असन्तुष्ट बनेका छन् । दलहरुले सहमति गर्न नसकेको नभई नचाहेका हुन् भन्दै आएका नेम्वांगले आफ्नो असन्तुष्टी शीर्ष नेतासमक्ष राखिसकेका छन् ।
सभामुख नेम्वांगले विपक्षी नेता पुष्पकमल दाहालसँग कहिले सहमति गर्नुहुन्छ ? कति दिन भयो भने पुग्छ भनेर पटकपटक सोधिसकेका छन् । सभामुख नेम्वांगले पर्याप्त समय नदिएर प्रक्रिया सुरु गरेका कारण सहमतिको वातावरण बिग्रेको आरोप लगाउने एमाओवादीले एक महिना बित्दासमेत कुनै सहमति हुन नसकेपछि सभामुख नेम्वांगको प्रश्नको जवाफ दिन सकेको छैन ।
उता सत्तारुढ दलका नेताहरुसँग पनि सभामुख नेम्वांगले यही प्रश्न गर्ने गरेका छन् । प्रक्रियामा जान दवाव दिने बेलामा सत्तारुढ दलका शीर्ष नेताहरुले प्रक्रिया सुरु गरेमा त्यसबाट एमाओवादीमाथि सकारात्मक असर पर्ने र संविधान निर्माणले गति लिने विश्वास उनलाई दिलाएका थिए । नेम्वांग निकट स्रोतले भन्यो– ‘न प्रक्रिया अघि बढ्यो, न त सहमतिका लागि नै ठोस प्रयास भयो । बेकारमा सभामुखलाई मात्र विवादित बनाउने काम भयो ।’