१४ जेष्ठ २०७२, बिहीबार ०५:५१ बुधवार साप्ताहिक, नयाँबानेश्वर, काठमाण्डौं

दुई वरिष्ठबीच के भयो ?

काठमाडौं । खासमा एमाले वरिष्ठ नेता माधवकुमार नेपाललाई समवेदना दिन अरू नेता झैं कांग्रेस वरिष्ठ नेता शेरबहादुर देउवा कोटेश्वर महादेवस्थान पुग्नुभएको थियो । तर, अरू आगन्तुकलाई छोडेर माथिल्लो तलामा दुई पूर्वप्रधानमन्त्रीबीच आधा घन्टा कसरी राष्ट्रिय सहमतिको सरकार बनाउन सकिएला भन्ने विषयमा
छलफल भयो ।
स्रोतका अनुसार, आफ्नै पार्टी सभापतिको नेतृत्वमा सरकार भएका कारण उनलाई हटाएर अर्को पार्टीको नेतृत्वमा सरकार बनाउनुपर्छ भनेर देउवाले औपचारिक रूपमा भन्ने कुरा भएन । तर, उनले बुझिने गरी ‘म रेसमा छैन, जसले सक्ने हो राष्ट्रिय सरकार बनाए हुन्छ’ भन्दै प्रस्ट संकेत चाहिँ गरेका छन् । कसैले पनि वर्तमान सरकारले केही गर्न सक्छ भन्न सक्ने कुरै छैन । देउवाले पनि ‘यस्तो बेलामा के गर्‍या होला ? सरकारै छैन यहाँ भनेर भन्देखिनलाई’ भन्न लागेको एक महिनै बितिसकेको छ ।
सोमबार साँझ वरिष्ठ नेता नेपालसँग पनि देउवाले यही कुरा दोहोर्‍याएको बुझिएको छ । ‘मानिसहरूमा निराशा बढेको छ, सरकार छ भन्ने अनुभूति नै हुन छोडेको छ । यस्तो बेलामा छिटो राष्ट्रिय सरकार गठन गर्नुपर्‍यो’ भन्दै देउवाले त्यसका लागि पहल गर्न नेपाललाई आग्रह गरेका थिए । उनको भनाइ थियो– ‘बुझिहाल्नुभएको छ नि, मैले धेरै कुरा गर्न मिलेन ।’
पिताजीको काजकिरियामा नबसे पनि दिनभर जस्तो भाइ विनोद र सरोजसँग कोटेश्वर महादेवस्थानकै पितृमुक्ति सदनमा बस्ने वरिष्ठ नेता नेपाललाई भेट्न आउने अरू नेताहरूले पनि राष्ट्रिय सहमतिको सरकारका लागि पहल गर्न आग्रह गरिरहेका छन् ।