२३ असार २०७२, बुधबार ०८:०१ बुधवार साप्ताहिक, नयाँबानेश्वर, काठमाण्डौं

नसर्दै भेटघाट सुरु

काठमाडौं । भूकम्पका कारण बल्खुस्थित केन्द्रीय कार्यालय बस्न अयोग्य भएपछि नेकपा
(एमाले)को कार्यालय धुम्बाराहीस्थित पासाङ ल्हामु प्रतिष्ठानमा सर्ने तयारीमा छ । त्यहाँ भौतिक संरचना निर्माण भइरहेको छ । निर्माण सम्पन्न भएर कार्यालय सर्न अझै करिब एक महिना लाग्ने भए पनि महासचिव ईश्वर पोखरेलले निर्माणाधीन कार्यालयमै भेटघाट सुरु गर्नुभएको छ ।
पोखरेलनिकट स्रोतका अनुसार उहाँले एक हप्तादेखि कार्यकर्तासँग बिहानको समयका भेटघाट त्यहीँ गरिरहनुभएको छ । महासचिव पोखरेल हरेक दिन बिहान ८ नबज्दै नयाँ कार्यालय पुग्नुहुन्छ । त्यसो हुँदा निर्माणको काम पनि उहाँकै प्रत्यक्ष निगरानीमा हुने गरेको छ । पोखरेल बस्ने महासचिव कक्ष अध्यक्षको कक्षभन्दा मुुनिको तलामा उपाध्यक्ष, उपमहासचिव र सचिवहरूसँगै निर्माण गरिएको थियो । तर, त्यहाँ ठाउँ साँघुरो भएको भन्दै पोखरेलले आफ्नो कार्यकक्ष अध्यक्ष बस्ने माथिल्लै तलामा सार्न लगाइसक्नुभएको छ ।
नयाँ कार्यालयको निर्माण अन्तिम चरणमा पुगिसकेको छ । नयाँ कार्यालयको छतमा ट्रस्ट हालेर बैठक कक्ष बनाइएको छ । त्यसमुनि अध्यक्ष, दुई वरिष्ठ नेता र महासचिवको कार्यकक्ष छ । त्यसभन्दा मुनि पाँच उपाध्यक्ष, दुई उपमहासचिव र पाँच सचिवको कार्यकक्ष बनाइएको छ । त्यसभन्दा मुनि अन्य प्रशासनिक कक्ष रहने गरी कोठा निर्माण गरिएका छन् ।