२९ बैशाख २०७३, बुधबार ०६:०५ बुधवार साप्ताहिक, नयाँबानेश्वर, काठमाण्डौं

पोखरा विमानस्थलमा उस्तै धन्दा

काठमाडौं । पोखरा क्षेत्रीय विमानस्थललाई अन्तर्राष्ट्रिय विमानस्थलका रूपमा रूपान्तरण गर्ने योजना अघि बढे पनि विमानस्थल परियोजनाका प्रमुखकै कारण योजना अन्योलमा परेको छ ।
आयोजना प्रमुख प्रदीप अधिकारीले नेपाल नागरिक उड्डयन प्राधिकरणका महानिर्देशक सञ्जीव गौतमसँग मिलेर आयोजनालाई आर्थिक चलखेलको थलो बनाएका छन् । अधिकारीले आयोजनाको जिम्मेवारी लिएयता हरेक आयोजनामा लागत बढाएर आयोजना तहसनहस पार्ने काम गरेको आरोप लागेको छ ।
अहिले पनि आयोजनाअन्तर्गतका हरेक ठेक्काहरूमा कमिसनकै लागि लागत बढाउने र आयोजना ढिलाइ गर्ने काममा अधिकारीको एक मात्र ध्यान जाने गरेको बताइएको छ ।
उनले २०७२ चैत ६ गते राइजिङ नेपालमा सूचना प्रकाशित गरी आयोजनाबारे टेन्डर आह्वान गर्न लगाएका थिए ।
ग्याबिन आरसी रिटेनिङ वाल निर्माणका लागि टेन्डर आह्वान भएकोमा नियोजित तरिकाबाट मृत सञ्जीवनी ज्वाइन्ट भेन्चरलाई ठेक्का दिलाएर नियमावलीविपरीत काम गरेको बताइएको छ ।
उक्त कामका लागि २० वटा कम्पनीले फर्म दर्ता गराएकोमा सुरुमा चारवटालाई सर्ट लिस्ट गरिएको थियो । सो कामका लागि कन्सल्टेन्सी लगाई ५ लाख रुपैंयाँ खर्च सुरुमा देखाइएको तर पछि कन्सल्टेन्सीको रिपोर्टका आधारमा भन्दै लागत ३ करोड पुर्‍याइएको बताइन्छ ।
गत वर्ष उक्त कम्पनीले काम गर्दा लागत बढाए पनि काममा गुणस्तर नआएको बताइन्छ । सो ग्याबिन वाल लगाए पनि पानीको बहावले दुई रोपनी जग्गा बगाएर लगेको थियो ।
अहिले पनि सोही कम्पनीलाई मात्र ठेक्का दिने गरी प्रावधान सच्याउनेतिर अधिकारी लागेको बताइन्छ । भवन मर्मत गर्न ५ लाख रुपैंयाँको लागतसम्म मात्र विना प्रतिस्पर्धा ठेक्का दिन मिल्ने नियम छ । तर, उनले सो कम्पनीलाई ९ लाख ३० हजार रुपंैयाँको ठेक्का दिएका थिए । यसरी नियमावलीविपरीत काम हुँदा पनि सुब्बा र खरिदारलाई १० हजार घूस खाएको बहानामा
रंगेहात पक्रिने अख्तियार रमिते बनेर बसेको छ ।
त्यसो त अधिकारी मुगुमा हुँदा गरेको अनियमितताको फाइल खोल्ने मात्र आँट गरे पनि उनको जागिर चिप्लिने निश्चित रहेको बताइन्छ ।