२० पुष २०७३, बुधबार ०९:१४ बुधवार साप्ताहिक, नयाँबानेश्वर, काठमाण्डौं

अन्ततः हटिछाडे अजितमान

काठमाडौं । अन्ततः लुम्बिनी विकास कोषका विवादास्पद सदस्य सचिव अजितमान तामाङले कोषको कामबाट हात झिक्नुपरेको छ । सदस्य सचिवमा नियुक्त भएदेखि नै विवादास्पद कामहरू गर्दै आएका तामाङलाई एक वर्ष अवधि बाँकी छँदै संस्कृति, पर्यटन तथा नागरिक उड्डयन मन्त्रालयमा हाजिर गराइएको छ ।
विद्युत् प्राधिकरणको मिटर रिडरबाट सिधै कोषको सदस्य सचिवमा नियुक्त भएका तामाङले आफ्नो फाइदा र स्वार्थका लागि कोषलाई नै बन्धक बनाउँदै आइरहेका थिए । लाभका निम्ति विदेशी कम्पनीहरूलाई विश्व सम्पदा सूचीमा रहेको लुम्बिनीभित्र विभिन्न विहार बनाउन दिनेसम्मका चलखेल गरेका तामाङलाई केही दिनअघि मात्रै मन्त्रालयले सदस्य–सचिवबाट हटाएर मन्त्रालयमा हाजिर गराइरहेको छ ।
पछिल्लो समय, लुम्बिनीमा कार्यरत ज्यालादारी मजदुरहरूको आवाजलाई नसुनेपछि उनी र मजदुरहरूबीच द्वन्द्व बढेको थियो । त्यही कारण, उनले हटाएकामध्ये ज्यालादारी कर्मचारी रवीन्द्रप्रसाद शुक्लाले तामाङको राजीनामा माग्दै आमरण अनशन थालेका थिए । अनशनमा बसेका शुक्लासँग मन्त्रालयका सहसचिव घनश्याम उपाध्यायको टोलीले वार्ता गरे पनि शुक्लाले अनशन नछाडेपछि समस्या बल्झिँदै गएको थियो ।
मन्त्री जीवनबहादुर शाहीले तामाङलाई राजीनामा दिएर समस्या समाधान गर्न पटकपटक आग्रह गरे पनि उनले अटेर गर्दै आएका थिए । राजीनामा पनि नदिने र लुम्बिनीको समस्याप्रति पनि आँखा चिम्लिन थालेपछि उनलाई बाध्य भएर मन्त्रालयमा तानिएको बताइन्छ । तामाङलाई सदस्य सचिवबाट हटाएपछि उपाध्यक्ष भिक्षु निग्रोधलाई अर्को व्यवस्था नहुन्जेलका लागि जिम्मेवारी दिइएको छ । तर, उपाध्यक्ष निग्रोध पनि लामो समय काठमाडौंमा बस्ने र लुम्बिनीमा आक्कलझुक्कल मात्र जाने भएका हुँदा उनीबाट पनि लुम्बिनीका कर्मचारी र व्यवसायीहरूले उठाएको मागलाई पूरा गराउने अपेक्षा राख्न छाडिएको छ । यसअघि कर्मचारीहरूले आन्दोलन र अनशन गर्दा लुम्बिनी गएका उपाध्यक्ष निग्रोधलाई कर्मचारीहरूले दुव्र्यवहार गरेपछि एक दिन मात्रै लुम्बिनीमा बसेर काठमाडौं फर्किएका थिए ।
कोषका पदाधिकारीमा अहिले उपाध्यक्ष मात्र रहेका छन् । सदस्य सचिवबाट तामाङलाई हटाएपछि उपाध्यक्ष मात्र रहेका हुन् । कोषाध्यक्षको यसअघि नै अवधि सकिएको हुँदा सो पद खाली रहेको छ भने दुई सञ्चालक पनि नियुक्त हुन सकिरहेको छैन ।