९ चैत्र २०७३, बुधबार ०५:३४ बुधवार साप्ताहिक, नयाँबानेश्वर, काठमाण्डौं

साझाका कर्मचारी दीनानाथका ड्राइभर

काठमाडौं । नेकपा (माओवादी केन्द्र) का नेता एवं पूर्वशिक्षामन्त्री दीनानाथ शर्माले चढ्ने गरेको गाडीको चालकमा साझा प्रकाशनका कर्मचारी रहेका छन् । साझाका अध्यक्ष एवं महाप्रबन्धक डोलिन्द्रप्रसाद शर्माले साझाका स्थायी कर्मचारीलाई दीनानाथको गाडी चलाउन पठाएका छन् भने आफ्नो निजी प्रकाशन गृह अक्सफोर्डका चालकलाई भने साझाको चालक पदमा नियुक्ति दिएका छन् ।
अहिले बेलायत भ्रमणमा रहेका अध्यक्ष शर्माले बेलायत जानुअघि नै साझाका कर्मचारी मेघराज ढुंगेललाई दीनानाथको ड्राइभिङ गर्न पठाएका थिए । त्यसअघि भने साझाकै अर्का चालक हरि तिमल्सिनाले दीनानाथको गाडी चलाउँथे । तर, तिमल्सिनाको एउटा दुर्घटनामा खुट्टा भाँचिएको हुँदा अहिले ढुंगेलले चलाइरहेका हुन् ।
आफ्ना कर्मचारीलाई दीनानाथको ड्राइभरमा पठाएका अध्यक्ष शर्माले आफ्नै प्रकाशन गृह अक्सफोर्डमा चालकका रूपमा काम गर्दै आएका सुवासप्रसाद पाण्डेलाई भने साझाको केन्द्रीय कार्यालयमा चालक पदमै हालसालै नियुक्त गरेका छन् । अध्यक्ष शर्माले सञ्चालक समितिले स्थगन गर्न भने पनि साझामा करारअन्तर्गत थुप्रै कर्मचारीहरू भर्ना गरेका छन् । सबै राजनीतिक दलका प्रभावशाली नेताहरूका एक–एकजना मान्छे राखेर उनले करिब चार दर्जन नयाँ कर्मचारी भर्ना गरेका छन् ।
अरूका चाकडी बजाउन सिपालु शर्माले साझामा अक्सफोर्डकै केही कर्मचारीलाई करारमा भर्ना गर्न भ्याएका छन् । अक्सफोर्डमा काम गर्ने डाइलकबाबु हमाल र उनका भाइ कुमार हमाललाई करारमा भर्ना गरेका छन् । यसैगरी, वन तथा भूसंरक्षणमन्त्री शंकर भण्डारीको सिफारिसमा विमल केसी, नेत्रविक्रम चन्दको पार्टीमा रहेका ललितबहादुर विश्वकर्मा र सांसद रञ्जुकुमारी झाको सिफारिसमा दिनेशकुमार मण्डल र हीरानन्द झालाई समेत करारमा राखेका छन् । यसैगरी, स्वैच्छिक अवकाशमा सूचीमा चढिसकेका केही कर्मचारीलाई माओवादीनिकट भएकै आधारमा थमौती गरिएको छ । ती भाग्यमानी कर्मचारीहरूमा जितेन्द्र मालाकार, गुनुमाया गुरुङ, राजु गुरुङ र डोलिन्द्रको चम्चागिरी गर्ने आत्मराम घिमिरेलाई थमौती गरिएको छ । यसैगरी, पत्रकार ठाकुर बेल्वासेकी श्रीमती रेवता पौडेल बेल्वासेलाई पनि करारमा भर्ना गरिएको छ । साथै, पहिला माउन्टेन टेलिभिजनमा काम गर्ने सुजिता केसीलाई डोलिन्द्रले आफ्नै स्वकीय सचिवमा राखेका छन् । उनलाई सूचना अधिकारीका रूपमा नियुक्त गरे पनि पीएका रूपमा राख्दै आएका छन् ।
अध्यक्ष शर्माले माओवादी नेता दीनानाथलाई कतिसम्म चाकडी गर्छन् भन्ने उदाहरण साझाका पूर्वअध्यक्ष ममता झाको छोरीको बिहेमा देखिएको थियो । ममताकी छोरीको बिहेको निम्तो मान्न पुगेका दीनानाथले बेहुलीलाई टीका लगाएर दिने पैसाको बन्दोबस्त पनि डोलिन्द्रले नै गरिदिएका थिए । डोलिन्द्रले खाममा केही रकम राखेर ‘दुलहीलाई दिनू’ भन्दै दीनानाथको हातमा त्यो खाम थमाइदिएका थिए ।