२३ चैत्र २०७३, बुधबार ०५:४७ बुधवार साप्ताहिक, नयाँबानेश्वर, काठमाण्डौं

व्यापारीको चुनावमा युवा आकांक्षी धेरै

काठमाडौं । नेपाल उद्योग वाणिज्य महासंघको निर्वाचन जति–जति नजिकिँदै छ, उद्योगी–व्यापारीहरूबीच आफ्नो समूहलाई जिताउने दौडधुप पनि उत्तिकै बढेको छ । वरिष्ठ उपाध्यक्षका उम्मेदवारद्वय शेखर गोल्छा र किशोर प्रधान बेग्लाबेग्लै समूह घोषणा गरेर चुनावी मैदानमा होमिएका छन् । प्रधान समूहले यसअघि नै आफ्नो समूह घोषणा गरेका थिए भने गोल्छाले भने मंगलबार उम्मेदवार घोषणा सभा गरेको छ ।
वरिष्ठ उपाध्यक्ष नै अर्को कार्यकालमा स्वतः अध्यक्ष हुने व्यवस्था विधानले गरेपछि अहिले वरिष्ठ उपाध्यक्षका लागि कडा प्रतिस्पर्धा देखिएको हो । वरिष्ठ उपाध्यक्षका साथै अरू उपाध्यक्षहरूमा पनि कडा प्रतिस्पर्धा हुने देखिएको छ । तर, एसोसिएटतर्फको उपाध्यक्षमा ग्लोबल आईएमई बैंकका अध्यक्ष चन्द्र ढकाल निर्विरोध भएका छन् । एसोसिएटतर्फको उपाध्यक्षमा अरू कसैले उम्मेदवारी नदिएका हुँदा उनी स्वतः चयन भएका हुन् ।
गोल्छा समूहबाट वस्तुगततर्फको उपाध्यक्षमा उमेशलाल श्रेष्ठ, जिल्ला नगरतर्फको उपाध्यक्षमा दिनेश श्रेष्ठ उठेका छन् भने प्रधान समूहबाट वस्तुगततर्फ शंकर पाण्डे र जिल्ला नगरमा प्रमोद श्रेष्ठ उठेका छन् । वस्तुगतकै उपाध्यक्षमा अनुपबहादुर मल्ल पनि उठेका छन् । त्यस्तै, जिल्ला नगरतर्फ १८ सदस्यका लागि २९ जनाले, एसोसिएटतर्फ १९ सदस्यका लागि ३१ जनाले उम्मेदवारी दिएका छन् ।
यसपटकको महासंघको चुनावमा केही पूर्वअध्यक्षका छोराहरूले पनि उम्मेदवारी दिएका छन् । जसमा पूर्वअध्यक्ष पद्मज्योतिका छोरा सौरभ ज्योति, प्रदीपकुमार श्रेष्ठका छोरा उदीप श्रेष्ठ र प्रदीपराज पाण्डेका छोरा प्रबलजंग पाण्डेले एसोसियटतर्फ सदस्यमा उम्मेदवारी दिएका छन् । यसपटकको महासंघको निर्वाचनमा अधिकांश युवाहरूले आकांक्षा देखाएका छन् ।
गोल्छाको समूहमा विवादमा मुछिएका उम्मेदवारहरू त्यति नभए पनि प्रधानको समूहमा भने केही विवादास्पद व्यक्तिहरू रहेका छन् । वैदेशिक रोजगारी क्षेत्रमा विसंगति भिœयाउन माहिर ठानिएका हंसराज वाग्ले र ग्यासको फुटरिंक गरेर बदनामी कमाएका शिवप्रसाद घिमिरे प्रधान समूहबाट चुनाव उठेका छन् ।