६ बैशाख २०७४, बुधबार ०६:२६ बुधवार साप्ताहिक, नयाँबानेश्वर, काठमाण्डौं

प्रचण्डलाई उकास्ने बादल र पम्फा !

काठमाडौं । जसरी भए पनि तोकिएको मितिमा स्थानीय निर्वाचन गर्ने प्रतिबद्धता व्यक्त गर्दै आएका प्रधानमन्त्री पुष्पकमल दाहाल ‘प्रचण्ड’ पछिल्लो समय चुनावमा जाने कि नजाने भन्ने सकसमा रहेको बताइन्छ । पार्टीभित्रकै एउटा समूहले कुनै पनि हालतमा चुनावमा जान र अर्को समूहले चुनावमा नजान दिएको दबाबको चेपुवामा प्रधानमन्त्री दाहाल परेको बुझिएको छ ।
माओवादीनिकट स्रोतका अनुसार पछिल्लो समय माओवादीसँग एकता गरेर आएका रामबहादुर थापा ‘बादल’ र पम्फा भुसाललगायतको समूहले प्रधानमन्त्रीलाई मधेसी मोर्चा नआई स्थानीय तहको निर्वाचनमा नजान दबाब दिएको छ । निर्वाचन पर धकेल्दा सत्तामा लामो समयसम्म रहने र आफूअनुकूल बजेट पनि ल्याउन पाइने हुनाले चुनाव धकेल्न यो समूहले सुझाव दिएको छ । तर, नारायणकाजी श्रेष्ठको समूहले जसरी पनि तोकिएको मितिमा सथानीय तहको निर्वाचन गर्नुपर्ने भन्दै प्रधानमन्त्री दाहाललाई निर्वाचनभन्दा दायाँबायाँ नगर्न भन्दै आएका छन् । हुन त प्रधानमन्त्री दाहाल आफैं पनि तोकिएकै समयमा निर्वाचन गर्ने पक्षमा रहेको बताइन्छ । पार्टीको लोकप्रियताको ग्राफ स्वात्त घटेका बेला चुनाव गरियो भने पार्टीले योचोटि हारे पनि २० वर्षसम्म हुन नसकेको चुनाव गरायो भन्ने जस लिएर पार्टीको हैसियत उठाउन सकिन्थ्यो कि भन्ने बुझाइले पनि प्रधानमन्त्रीलाई चुनाव गराउन प्रेरित गरेको बताइन्छ । नारायणकाजी श्रेष्ठ समूहले पनि दाहाललाई यही पाठ घोकाएको बताइन्छ । दुई समूहको यही चेपुवाका कारण मन्त्रिपरिषद्कै सदस्यले चुनावविरोधी अभिव्यक्ति दिँदा पनि प्रधानमन्त्री चुप लागेर बस्नुपरेको बताइन्छ ।