२ बैशाख २०८३, बुधबार ११:०८ बुधवार साप्ताहिक, नयाँबानेश्वर, काठमाण्डौं

दीपक खड्का प्रकरणमा नयाँ मोड: सर्वोच्चको आदेश, अनुसन्धान फाइल झिकाउन निर्देशन

काठमाडौं — सम्पत्ति शुद्धीकरणको आरोपमा पक्राउ परेका नेपाली कांग्रेसका नेता तथा पूर्वमन्त्री दीपक खड्का सम्बन्धी अनुसन्धानमा नयाँ मोड आएको छ।

सर्वोच्च अदालतले खड्कासम्बन्धी अनुसन्धान फाइल झिकाउन आदेश जारी गरेको हो। न्यायाधीश तिलप्रसाद श्रेष्ठ र शान्तिसिंह थापा को संयुक्त इजलासले राजस्व अनुसन्धान विभागलाई बिहीबार दिउँसो १२ बजेसम्म लिखित जवाफ पेश गर्न तथा अनुसन्धान फाइल अदालतमा बुझाउन निर्देशन दिएको छ।

खड्कालाई केन्द्रीय अनुसन्धान ब्युरो (CIB) ले चैत १५ गते पक्राउ गरेको थियो। यतिबेला उनीमाथि पटक–पटक म्याद थप गर्दै अनुसन्धान जारी राखिएको छ।

यसअघि भदौ २४ गते बूढानीलकण्ठस्थित उनको निवास जेन–जी आन्दोलनका क्रममा आगजनीमा परेको थियो। उक्त घटनापछि जलेका नोटका भिडियो तथा तस्बिर सार्वजनिक भएपछि प्रकरण थप चर्चामा आएको थियो।

यस्तै, खड्का ल्यान्ड डेभलपमेन्ट प्रालि मार्फत भएका विभिन्न आर्थिक कारोबार शंकास्पद देखिएपछि उनी अनुसन्धानको दायरामा आएका हुन्।